هل فندق اوريس بلازا البرشاء مناسب 7 نجوم

الاستفسارات‬‎

هل فندق اوريس بلازا البرشاء مناسب 7 نجوم

كانت مده اقامتي بالفندق من تاريخ 26 نوفمبر الى 30 نوفمبر يعني 4 ليالي

طريقتي بالحجز كنت بالبوكيينق ادور فنادق فجأه اشوفه و تقيم حقه عالي و فايف ستار و سعر جدا ممتاز و موقع كذلك كنت متخوفه احجز بالبوكينق دخلت على ويب سايت حقهم وهذا هو Auris-hotels
واخذت رقمهم المجاني واتصلت و قلت لهم اذا فيه خصم لشركه ارامكو سعوديه على طول قالت لي افكورس سير واعطيتها تواريخ اقامتي و قلت لها ابي غرفتين عطوني غرفه ديلوكس مع فطور صباحي و غرفه ثانيه كلاسيك مع فطور صباحي و سعر كان بـ 4000 ريال بصراحه انا على طول حجزت سعر جدا مغري طبعا مع خصم لموظفين شركه ارامكو

والحمدالله وصلت لدبي ساعه 1 ظهر و على طول على فندق مايضيع الانه خلف الامارات مول على طول
اول ماوصلت عطيتهم رقم الحجز و الحمدالله كانو مجهزين غرفه وحده وثانيه نص ساعه على ماجهزت بصراحه كان استقبالهم لنا جدا جميل و طيبين

تعالو معاي نشوف الغرفه ديلوكس

76f9ad29985613bd87379ac6ac680b71 0655885842cdd063063424e7847b7509 a3b027b018c7d1889cb2deec970d0ad0 822d81c87b94851823ef853dec1e32eb e7c4a6559478bb3a0ec80fd06b13d3f4 ace63955ff57bd9e375c63c09b9fd137 de293e9b6cc451ddeaea801b06508c66 itraveltodubai.com-20 9e7386910d9ef04e5981545e5effaff2 3ae38bd2ae1e2c72900fbfcaf0addfae cb31c7bf9a653434b3d8c4f6596be8d8 77ebb4cdf2746d18f2585406827e70d7 25bdb1404c4a9eab4c43c4fe9ae151f2 0e420a584344ae7fa2386d0525308048

الميني بار

وهذي الترحيب حقهم عباره عن بيريه و و صحن فواكه و علبه جوكليت

وهذا جمب الحمام معزول عن غرفه

دوره المياه جدا كبيره و نظيفه و تحتوي على سماعات ميوزك و انواع شامبو و لوشين و جل شاور ولوازم الاستحمام جدا رائحتهم جميله

وهذا الفيو الغرفه على مول الامارات مرا قريب من فندق

بالنسبه للغرفه ثانيه نفس ديزاين بالضبط بس كينغ بيد

واللحين تعالو نشوف مرافق الفندق السبا و مسبح و بوفيه الافطار و لوبي

هذي المسبح اخر دور كان كبير و صباح مرررا زحمه الاجانب بشكل مو طبيعي يفتح من ساعه 7 صباح الى 10 باليل و فيه كوفي شوب جمب المسبح للاسف ماصورته بسبب زحمه ناس امانه ماجربته يبيع ساندويتشات و برغر و مشروبات و كوفي و القعده مره جميله على المسبح و خاصه هالايام جلو حلو

و هذا سبا ليديز كان مرا هادي و ريلكس و مافي زحمه يفتح من 7 صباح الى 10 باليل عباره عن جاكوزي و ساونا و حمام بخار و تنظيف بشره بدكيرو مناكير و مساج كان خاطري اجرب المساج بس لما شفت الاسعار جدا جدا جدا مبالغ فيها و ماتسوى

واللحين تعالو نشوف بوفيه الافطار صحيت ساعه 9 صبح طلعا يفتح بوفيه الافطار من ساعه 7 الى 11 ظهر نزلت كان المطعم بالدور الاول و الا اتفاجئ بالزحمه بشكل ماتتخيل ومافي ولا طاوله فاضيه عطيتهم رقم غرفتي قالولي انتظري شوي على مانسوي لج طاوله بصراحه ماخلوني انتظر واجد يعني حوالي 10 دقايق الا نادوني انطباعي عن المطعم صغير و شوي كتمه مع ان ديكوراته حلوه اما عن طعام كانت الاصناف نوعا ما قليله و طعها مو مره و ازعاج و زحمه بس كانت الخدمه جدا ممتازه يعني اول ماقعدت بالطاوله وحده وقفت على راسي اي شي تبينه تجيبه

وهذا مطعم الافطار كان الشخص ب 85 درهم

بصراحه ماقدرت اصور البوفيه من زحمه ولكن صورت طاولتنا

اما اللوبي كان صغير مرا بس فيه على جنب كوفي شوب و فيه بعد قعدات حلوه و رايقه و فيه بعد قعده شعبيه و فيه بعد كوفي شوب للشيشه ما دخلت له

هذا لوبي

وهذا كوفي شوب جمب اللوبي

و بكذا خلصت صوري للفندق وسامحوني لقله الصور مثل ماقلت لكم كان جدا جدا زحمه عشان كذا ماقدرت اصور كل شي

واخيرا انطباعي عن الفندق

ايجابيات الفندق :

بصراحه جدا جدا الفندق نظيف و موقعه مرا حلو و منطقه البرشاء فيها مطاعم كثيره وخدمات
و هادئ و تكنولوجيا بالغرف جدا جميله كل شي باللمس يعني الجرس باللمس واذا تبي ينظفون الغرفه برضوا باللمس و بالـ TV كل شي يطلع لك يعني المسجات من فندق توصل لك بالتلفزيون و الانترنت كان مجاني بالغرف انت توسيه بالانترنت و ايضا الفاتوره حقتك تطلعها بالتلفزيون يعني هذي تنلوجيا جديده مرا حلوه و ايضا تتحكم بالانوار الغرفه بريموت خاص
اما بالنسبه الاثاث الغرف جديده و امانه راقيه
اما الخدمه حقتهم جدا راقيه حبوبين و طيبين جدا اخذت من ميني بار بطاطس كان سعره بـ 45 درهم احسبوه لي بـ 25 درهم

اما السلبيات :
بوفيه الافطار ما عجبني المطعم و الاكل مو 5 ستار
و لوبي كان ضيق وصغير

وبكذا انشاءالله قدرت افيدكم بتقرير هذا الفندق الجميل و يستاهل 5 نجوم مع العلم انه جديد صار له سنه من افتتح

No Comments

Leave a Reply

Your email address will not be published. Required fields are marked *

الاستفسارات‬‎
1
برنامج سياحي دبي جاهز 10 ايام 2016

برنامج سياحي دبي جاهز 10 ايام 2016 موجوده فيه اهم الاماكن السياحية في دبي و افضل المطاعم و الفنادق و الشقق الفندقية البرنامج السياحي جاهز للتحميل على كمبيوترك او جوالك           

الاستفسارات‬‎
الدليل الشامل والكامل لكل ما تحتاجه في دبي بالتفاصيل الدقيقه جدا

الدليل الشامل والكامل لكل ما تحتاجه في دبي بالتفاصيل الدقيقه جدا التقرير حيكون عباره شرح تفصيلي عن جميع الآماكن التي زرتها مع معلومات وافيه عن الآسعار ومواعيد العمل والموقع ومميزات وعيوب كل مكان واكثر على شكل دليل شامل وكامل لكل من يرغب بزياره دبي بالتفاصيل الدقيقه جدا لعيونكم . التقرير …

الاستفسارات‬‎
ما هي عروض فندق كاسيلز البرشا

ما هي عروض  فندق كاسيلز البرشا حبيت انقل لكم عرض كاسيلز البرشا عن طريق موقع الفندق الرسمي العرض 3 ليال على الاقل ارخص من البوكينج جناح رئاسي غرفتين وصالة ب 600 درهم في اليوم شاملة الضرائب والرسوم انا حجزت 7 ليال ب 4200 درهم السعر غير مسترد والعرض يشمل كل …